တရုတ်တည်ဆောက်မယ့် ရေလွှဲဆည်စီမံကိန်း ထိုင်းအတည်ပြု


25 October, 2021

ထိုင်းနိုင်ငံထဲက Yuam မြစ်ကြောင်းမှာ တည်ဆောက်မယ့် အငြင်းပွားဖွယ် ရေလွှဲဆည်စီမံကိန်းကို ထိုင်းအစိုးရက ၂ ကြိမ်တိုင်တိုင် ပယ်ချခဲ့ပေမယ့် တရုတ်ကုမ္ပဏီတခုက တာဝန်ယူတည်ဆောက်ဖို့ ကမ်းလှမ်းခဲ့တဲ့နောက်မှာ စက်တင်ဘာလထဲမှာပဲ ထိုင်းသဘာဝဝန်းကျင်ဆိုင်ရာ ဘုတ်အဖွဲ့က ဒီစီမံကိန်းအတွက် EIA သဘာဝဝန်းကျင်အပေါ် သက်ရောက်မှုအလားအလာ တင်ပြချက်ကို လက်ခံ အတည်ပြုပေးလိုက်ပြီ ဖြစ်ပါတယ်။

အခုလို ဒီမြစ်ကြောင်းမှာ ရေလွှဲဆည်တည်ဆောက်ခွင့် ထိုင်းဘက်က ခွင့်ပြုလိုက်တာဟာ တရုတ်ရဲ့ ခါးပတ်လမ်းစီမံကိန်းအတွက် အကျိုးရှိစေမယ်လို့ အကဲခတ်တွေက သုံးသပ်ကြပါတယ်။

ထိုင်းနိုင်ငံရဲ့ သြဇာကြီးတဲ့ ဒုတိယဝန်ကြီးချုပ် Prawit Wongsuwan ဦးဆောင်တဲ့ သဘာဝဝန်းကျင်ဆိုင်ရာ ဘုတ်အဖွဲ့က ဒီ EIA သုံးသပ်ချက်ကို ၂ ကြိမ်တိုင်တိုင် ပယ်ချခဲ့တာဖြစ်ပြီး နောက်ဆုံးပယ်ချခဲ့တာက ၂၀၁၉ ဒီဇင်ဘာလမှာ ဖြစ်ပါတယ်။

အခုတော့ တရုတ်အစိုးရပိုင် ကုမ္ပဏီတခုဖြစ်တဲ့ Norinco International က ဒီရေလွှဲဆည် တည်ဆောက်ရေးအတွက် ခန့်မှန်းကုန်ကျစရိတ် ဒေါ်လာ ၂ ဒသမ ၁ ဘီလီယံအစား ထက်ဝက်လောက်နဲ့ တည်ဆောက်ပေးမယ့်အပြင် ဒီစရိတ်ကိုပါ ကျခံမှာဖြစ်ပြီး ခန့်မှန်းစီမံကိန်းကာလ ၇ နှစ်အစား ၄ နှစ်နဲ့ အပြီးတည်ဆောက်ပေးဖို့ ကမ်းလှမ်းခဲ့တာ ဖြစ်ပါတယ်။

ဒီရေလွှဲဆည် တည်ဆောက်ရေးနဲ့ ပတ်သက်ပြီး ဗွီအိုအေရဲ့ မေးမြန်းချက်ကို ဆည်မြောင်းဌာနကရော ထိုင်းအစိုးရဘက်ကပါ တုံ့ပြန်ဖြေကြားခြင်း မရှိသလို တရုတ်ကုမ္ပဏီ Norinco International ကလည်း မှတ်ချက်တစုံတရာ မပေးပါဘူး။

ဒီစီမံကိန်းဟာ ထိုင်း-မြန်မာ နယ်စပ်နားက Yuam မြစ် (သောင်ရင်းမြစ်ထဲစီးဝင်တဲ့မြစ်) ကြောင်းကနေ Bhumibol ရေလှောင်ကန်ဆီကို ၃၈ မိုင်အရှည်လောက် မြေအောက်ရေပိုက်တွေနဲ့ ရေသွယ်ပို့မယ့် အတော်ကြီးမားတဲ့ ထိုင်းနိုင်ငံရဲ့ ပထမဆုံး စီမံကိန်းလည်း ဖြစ်ပါတယ်။

 

VOA

Region Read 218 times