မြန်မာသို့ ဆက်သွယ်မည့် ရထားလမ်း တည်နေရာစစ်တမ်း အိန္ဒိယ အတည်ပြု


16 January, 2022

မြန်မာသို့ ဆက်သွယ်မည့် ရထားလမ်း တည်နေရာစစ်တမ်း အိန္ဒိယ အတည်ပြု

 

တောင်အာရှတွင် နိုင်ငံတကာ ရထားအဆက်အသွယ် တိုးတက်ရေး အစီအစဉ် တစိတ်တပိုင်းအဖြစ် အိန္ဒိယမီးရထားဌာန (IR) က မဏိပူရပြည်နယ်မြို့တော် အင်ဖာမှ အိန္ဒိယ-မြန်မာနယ်စပ် မိုးရေးသို့ ဆက်သွယ်မည့် ၁၁၁ ကီလိုမီတာ (မိုင် ၇၀ နီးပါး) ရှည်သော သေနင်္ဂဗျူဟာကျသည့် ရထားလမ်းကျယ်အတွက် နောက်ဆုံး တည်နေရာစစ်တမ်း (FLS) ကို အတည်ပြုလိုက်သည်။

ထိုစီမံကိန်းသည် ဘဏ္ဍာရေးအရ အကျိုးအမြတ်မရှိဟု Rail India Technical And Economic Services (Rites) က အစောပိုင်းတွင်ပြုလုပ်သည့် စစ်တမ်းတွင် ကောက်ချက်ချခဲ့ပြီးနောက် ဆိုင်းငံ့ထားခဲ့သော စီမံကိန်း ဖြစ်သည်။ သို့သော် မီးရထားဆိုင်ရာဝန်ကြီး အက်ရှ်ဝါနီ ဗိုင်ဘောက အရှေ့မြောက်နယ်စပ် မီးရထားဌာန (NFR) အနေဖြင့် ထိုစီမံကိန်းကို ၃ နှစ်အတွင်း ပြီးစီးအောင် အကောင်အထည်ဖော်ရန် ညွှန်ကြားခဲ့သည်။

အဆိုပြုထားသည့် အာရှဖြတ်ကျော် ရထားလမ်းကွန်ရက်၏ အရေးပါသော အစိတ်အပိုင်းဖြစ်သော ထိုရထားလမ်းသည် အိန္ဒိယနှင့် မြန်မာ၊ ထိုင်းနှင့်နောက်ဆုံးတွင် တရုတ်နိုင်ငံအထိ ဆက်သွယ်ပေးမည့် ရထားလမ်းဖြစ်သည်။ မိုးရေးသည် တောင်အာရှတွင် ကုန်သွယ်ရေး အချက်အခြာ ဖြစ်လာနိုင်သည်ဟု အိန္ဒိယ အစိုးရက ယုံကြည်နေသည်။

၂၀၂၁ ခုနှစ်၊ ဩဂုတ်လ ၁၅ ရက်နေ့တွင် ကျရောက်သည့် လွတ်လပ်ရေးနေ့၌ ပြောကြားသည့် မိန့်ခွန်းတွင် အိန္ဒိယဝန်ကြီးချုပ် မစ္စတာ နရန်ဒရာမိုဒီက ပြည်ထောင်စုအစိုးရသည် တောင်ထူထပ်သည့် နိုင်ငံအရှေ့မြောက် ပြည်နယ်များတွင် ကာလကြာမြင့်စွာ စောင့်ဆိုင်းနေသည့် အမြန်ရထားလမ်း တည်ဆောက်မည့် ဆုံးဖြတ်ချက်ကို ကြေညာခဲ့သည်။

စုစုပေါင်း ၂၀၀၈ ကီလိုမီတာ (မိုင် ၁၂၄၀ ကျော်) ရှည်ပြီး ရူပီးငွေ ၇၅၅ ဘီလီယံ (အမေရိကန်ဒေါ်လာ ၁၀ ဒသမ ၂ ဘီလီယံ) ကုန်ကျမည်ဟု ခန့်မှန်းထားသည့် ရထားလမ်းသစ် ၁၃ ခုနှင့် ရထားလမ်း ထပ်မံတိုးချဲ့ခြင်း ၆ ခု အပါအဝင် ထိုဒေသမှ စီမံကိန်း ၁၉ ခုအနက် ၁၁ ခု၏ အဓိက အစိတ်အပိုင်းများကို ၂၀၂၃ ခုနှစ်တွင် ပြီးစီးမည်ဟု မျှော်လင့်ရသည်။

၄၄ ကီလိုမီတာ (၂၇ မိုင်ကျော်) ရှိ ဆီဗော့-ရန်ဂပို ရထားလမ်း၊ ၁၁၀ ဒသမ ၆၂ ကီလိုမီတာ (၆၈ မိုင်ကျော်) ရှည်သည့် ဂျီရီဘမ်-အင်ဖာ ရထားလမ်းနှင့် ၅၁ ဒသမ ၃၈ ကီလိုမီတာ (၃၁ မိုင်ကျော်) ရှည်သည် ဘိုင်ရာဘီ-ဆိုင်ရန်း ရထားလမ်းများ အပါအဝင် ထိုစီမံကိန်းများအနက် အများအပြားကို စီစဉ်ထားသည်မှာ ၁၅ နှစ်ကျော် ကြာပြီဖြစ်သည်။ အချို့စီမံကိန်းများမှာ မြေနေရာရရှိရေး ပြဿနာများကြောင့် တုံ့ဆိုင်းနေပြီး အခြားစီမံကိန်းများအတွက် နည်းပညာဆိုင်ရာ ကန့်သတ်ချက်များကို မီးရထားဘုတ်အဖွဲ့က မဆုံးဖြတ်နိုင် ဖြစ်နေသည်။

“ဟိမဝန္တာမှာ အဆိုပြုထားတဲ့ အိန္ဒိယရထားလမ်းအ စီမံကိန်းများစုမှာ စီမံမှုမှားယွင်းတာကြောင့် လမ်းကြောင်းနဲ့ ဒီဇိုင်းက အကြိမ်ကြိမ်ပြောင်းနေတယ်” ဟု အိန္ဒိယ မီးရထားမှ အင်ဂျင်နီယာချုပ်ဟောင်း မစ္စတာ အလော့ ကူးမား ဗာမားက ပြောသည်။

အိန္ဒိယမီးရထားဌာနသည် နယ်စပ်ဖြတ်ကျော် ရထားလမ်းနှစ်ခုကို တည်ဆောက်နေဆဲ ဖြစ်သည်။ တခုမှာ ၁၂ ဒသမ ၃ ကီလိုမီတာ (၇ မိုင်ခွဲနီးပါး) ရှည်ပြီး အိန္ဒိယနိုင်ငံ အဂါတာလာမှ ဘင်္ဂလားဒေ့ရှ်နိုင်ငံ အခါအူရာကို ဆက်သွယ်သည့် ရူပီး ၉ ဒသမ ၈ ဘီလီယံကုန်ကျသည့် ရထားလမ်းဖြစ်ပြီး အခြားတခုမှာ ဂျော့ဘန်နီနှင့် နီပေါနိုင်ငံ ဘီရက်နာဂါကို ဆက်သွယ်သည့် ၈ ဒသမ ၆ ကီလိုမီတာ (၅ မိုင်နီးပါး) ရှည်သော ရထားလမ်းဖြစ်သည်။ ထိုရထားလမ်းနှစ်ခုလုံးကို ဒီဇင်ဘာလတွင် ပြီးစီးရန် စီစဉ်ထားသည်။

ကိုးကား။ ။ International Rail Journal

burma.irrawaddy.com/

Infrastructure and Zones Read 586 times