ရန်ကုန်တိုင်းဒေသကြီး ဒဂုံမြို့သစ်တောင်ပိုင်း၌ နိုင်ငံတကာအဆင့်မီဖူဆယ်အားကစားရုံ တည်ဆောက် လျက်ရှိရာ ၂၀၂၁ ခုနှစ် စက်တင်ဘာလတွင် ပြီးစီးမည်ဖြစ်ကြောင်း မြို့နယ်အားကစားနှင့် ကာယပညာ ဦးစီးဌာနမှ သိရသည်။
အဆိုပါ အားကစားရုံပြီးစီးသွားပါက ကစားသမားများ လေ့ကျင့်မွေးထုတ်ပေးနိုင်ခြင်း၊ ပြည်တွင်း သာမက နိုင်ငံတကာကို သွားရောက်ယှဉ်ပြိုင်နိုင်မည့် ကစားသမားများ ထွက်ပေါ်လာနိုင်မည်ဖြစ်ကြောင်း သိရသည်။
ယင်းအားကစားရုံကို ကျန်းမာရေးနှင့် အားကစား၀န်ကြီးဌာနခွဲဝေရန်ပုံငွေဖြင့် ၂၀၁၈-၂၀၁၉ ခုနှစ်တွင် ၂၅ ရာခိုင်နှုန်း၊ ၂၀၁၉-၂၀၂၀ ခုနှစ်တွင် ၅၀ ရာခိုင်နှုန်း တည်ဆောက်ခဲ့ခြင်းဖြစ်ပြီး ၂၀၂၀-၂၀၂၁ ခုနှစ်တွင် ၂၅ ရာခိုင်နှုန်း ဆက်လက်တည်ဆောက်ရန် ကျန်ရှိသေးကြောင်း၊ ၂၀၂၁ ခုနှစ် စက်တင်ဘာလတွင် ပြီးစီးရန် လျာထားကြောင်း သိရသည်။
နိုင်ငံတကာအဆင့်မီ ဖူဆယ်အားရုံသည် ဒဂုံမြို့သစ်တောင်ပိုင်း အမှတ်(၂၅)ရပ်ကွက် ပုလဲရတနာ လမ်းတွင် ၂၀၁၉ ခုနှစ် စက်တင်ဘာက စတင်တည်ဆောက်လျက်ရှိပြီး အလျား၂၄၉ ပေ ၊ အနံ ပေ ၁၉၀ ၊ အမြင့် ၅၇ ပေရှိကာ ငွေကျပ်သိန်း နှစ်သောင်းခန့် ကုန်ကျမည်ဖြစ်ကြောင်း သိရသည်။
အာကာစိုး (MDN)
