ရန်ကုန်တိုင်းဒေသကြီး ကွန်ဒိုမီနီယံကြီးကြပ်ရေးကော်မတီမှ ဆောက်လုပ်ပြီးနှင့် ဆောက်လုပ်ဆဲ ကွန်ဒိုမီနီယံ တိုက်ခန်းများကို ကွန်ဒိုမီနီယံ အဆောက်အအုံ အဆင့်ရှိ၊ မရှိ ယခုနှစ်မကုန်ခင် နိုင်ဝင်ဘာလအတွင်း စိစစ်ပြီး သတ်မှတ်ချက်မပြည့်မီပါက ကွန်ဒိုအဆောက်အအုံအဖြစ်မှပယ်ဖျက်မည်ဖြစ်ကြောင်း သိရသည်။
စီမံကိန်း ၂၄ ခုရှိရာတွင် ၁၅ ခု လောက်ကစတင်နေပြီဖြစ်ကြောင်း၊အခန်းတွင်း တန်ဖိုးကိုတွက်ချက်ပြီး အကြမ်းဖျင်းတွဲတင်ရမှာဖြစ်ကြောင်း၊ ခံဝန်ထိုးပြီးလျှင်လိုအပ်သည်များကို စိစစ်ပြီး ကွန်ဒိုမီနီယံကြီးကြပ်ရေး ကော်မတီ၏ ဆုံးဖြတ်ချက်နှင့် စတင်ခွင့်ပြုသွားမည်ဖြစ်ကြောင်း သိရသည်။
ကွန်ဒိုမီနီယံဥပဒေကို အကောင်အထည်ဖော်နိုင်ရန် ကြီးကြပ်ရေးကော်မတီရှိရန်အတွက် ၂၀၁၈ ခုနှစ် ဒီဇင်ဘာ ၃၁ ရက်က ဆောက်လုပ်ရေးဝန်ကြီး ဌာနမှ ရန်ကုန်တိုင်းဒေသကြီး၏ ကွန်ဒိုမီနီယံနှင့် ပတ်သက်သော ကြီးကြပ်ရေးကော်မတီကို ဖွဲ့စည်းခဲ့ပြီးဖြစ်ကြောင်း သိရသည်။
ကွန်ဒိုများမှာ အနည်းဆုံး ခြောက်ထပ်နှင့် အထက်ရှိရမည်ဖြစ်ပြီး အကျယ်အဝန်းအားဖြင့် ၂၀ဝဝဝ စတုရန်းပေ အထက်ရှိသော မြေပေါ်တွင် တည်ဆောက်ထားရမည်ဖြစ်ကြောင်း၊ ကွန်ဒိုဥပဒေသစ်အရ မြေပိုင်ရှင်တစ်ဦးတည်းအမည်ပေါက် မဟုတ်တော့ဘဲ စီမံခန့်ခွဲရေးကော်မတီထံတွင် ယင်းမြေကို အပ်နှံရမည်ဖြစ်ပြီး တစ်ဦးတစ်ယောက်ပိုင်မြေ မှ အများပိုင်မြေအဖြစ် လွှဲပြောင်းရမည်ဖြစ်ကြောင်း သိရသည်။
